У чэрвені 2026-га гадавая інфляцыя ў Беларусі склала 4,3%. Такія дадзеныя прывёў Белстат.
У папярэднім месяцы яна была 4,8%, у сакавіку і красавіку трымалася на ўзроўні 5,4%.
У параўнанні з маем 2026-га цэны выраслі на 0,3%, з пачатку года гэты паказчык склаў 2,9%.
Мацней за ўсё падаражэлі паслугі: за год цэны на іх павысіліся на 8,8%, з пачатку 2026-га – на 6,7%. Рост за месяц склаў 0,8%.
Цэны на харчовыя тавары паказалі гадавы рост у 3,4%. З канца 2025-га яны павысіліся на 1,8%, а за чэрвень – на 0,3%.
Павольней за ўсё даражэюць нехарчовыя тавары: +2,1%, +1,5% і +0,1% адпаведна.
Паводле дадзеных Белстата, базавы індэкс спажывецкіх цэн, у якім выключаны ўплыў адміністрацыйных і сезонных фактараў, у чэрвені ў параўнанні з маем склаў 100,4%, а ў параўнанні са снежнем 2025-га – 102,3%.
Чаму зніжаецца інфляцыя
Раней улады тлумачылі запаволенне тэмпаў інфляцыі паслабленнем ціску з боку цэн на тавары, якія імпартуюцца ў краіну з-за мяжы.
Пры гэтым застаўся ўмераным уплыў айчынных вытворцаў на дынаміку цэн.
А вось манетарная палітыка "захоўвала накіраванасць на забеспячэнне фінансавай і макраэканамічнай стабільнасці".
Аналітыкі Еўразійскага банка развіцця лічаць, што па выніках 2026-га ўзровень інфляцыі застанецца ніжэйшым за гранічны параметр 7%.
