Работнікі беларускіх банкаў за першае паўгоддзе 2026-га выявілі 235 падробленых грашовых знакаў – 195 банкнот і 40 манет, паведамілі ў Нацбанку.
Пры гэтым 66% усіх фальшывак прыйшлося на Мінск. Аднак у цэлым падробленыя грошы знялі з абарачэння ў 30 населеных пунктах.
Часцей за ўсё трапляюцца фальшывыя долары – 66,8% ад усіх падробак. Самая "папулярная" купюра – $100. Такіх выявілі 108 штук.
У параўнанні з першым паўгоддзем 2025-га падробленых долараў стала менш у 1,6 разу.
А вось колькасць фальшывых еўра вырасла ў 5,6 разу. Іх доля – 23,8%.
"Асноўную колькасць выяўленых фальшывых еўра склалі манеты наміналам €2 (28 падробак) і €1 (11 падробак)", – удакладнілі ў Нацбанку.
Пры гэтым за ўказаны перыяд не было выяўлена ніводнай падробленай банкноты беларускіх рублёў.
Як друкуюць фальшыўкі
У Нацбанку раней сцвярджалі, што большасць банкнот вырабляюць з выкарыстаннем паліграфічных тэхналогій (плоскі і глыбокі друк).
Для ўзнаўлення выяў астатніх падробленых банкнот выкарыстаны тэхналогіі рэпраграфіі.
У асноўным струменны друк, а таксама электрафатаграфія для долараў ЗША і еўра, струменны друк для расійскіх і беларускіх рублёў, электрафатаграфія для злотых і фунтаў стэрлінгаў.
