Аэрапорт у Гродне практычна гатовы да паўнавартаснай працы. Пра гэта расказаў старшыня Гродзенскага аблвыканкама Юрый Караеў у эфіры тэлеканала ТРК "Гродна".
Засталося распрацаваць авіямаршруты.
Куды будзем лятаць з Гродна
Галоўныя работы па абнаўленні паветранай гавані Гродна ўжо завершаны, заявіў Караеў. У аэрапорце ўжо адрамантавалі ўзлётную паласу і абнавілі навігацыйнае абсталяванне.
У аднаўленні палётаў, паводле яго слоў, зацікаўлены як мясцовыя жыхары, так і турысты.
Менавіта з разлікам у першую чаргу на турыстычны паток будуць распрацаваны паветраныя маршруты. Першыя рэйсы, магчыма, прыбудуць з Масквы, Санкт-Пецярбурга, Краснадара і Растова. Губернатары гэтых гарадоў, адзначыў Караеў, абяцаюць поўную загрузку.
Аэрапорт у Гродне быў пабудаваны ў 1983 годзе. У савецкі час паветраныя маршруты звязвалі абласны цэнтр з Мінскам, Масквой, Кіевам, Ленінградам, Адэсай, Сочы, Сімферопалем, Брэстам і іншымі гарадамі СССР.
Пасля 1991 года ў поўную сілу аэрапорт не працаваў і выконваў толькі нерэгулярныя рэйсы ў Расію, Турцыю, Балгарыю.
