Пад Гроднам поўным ходам ідзе ўзвядзенне ўнікальнага турыстычнага аб'екта – горада XIX стагоддзя з тыповымі для таго часу аб'ектамі інфраструктуры. Паралельна з будаўнічымі работамі этнографы збіраюць унікальныя экспанаты для будучай экспазіцыі.
Інтэрактыўныя разынкі
Адным з галоўных экспанатаў стане сапраўдны друкарскі станок XVI стагоддзя, які яшчэ працуе.
Пры жаданні кожны турыст зможа надрукаваць першую старонку Бібліі Францыска Скарыны або вырабіць паперу па старадаўняй тэхналогіі ручнога адліву.
Яшчэ адной прыкметнай славутасцю стане "гадзіннік часу". Ён сабраны з дэталяў старадаўніх гадзіннікаў і друкарскіх станкоў. Штогадзіны ён будуць расказваць турыстам адзін эпізод з гісторыі Гродна.
А на чыгуначным вакзале парку ўжо фарміруюць сапраўдны паравоз пачатку XX стагоддзя.
Што будзе ў "Старым горадзе"
Культурна-гістарычны парк "Стары горад" будуецца на базе агратурыстычнага комплексу "Гарадзенскі маёнтак «Каробчыцы»".
Праект задуманы як узнаўленне паўнавартаснага горада канца XIX – пачатку XX стагоддзя. Тут пабудуюць каля дзесяці гістарычных дамоў, якія перадаюць архітэктурнае аблічча тагачаснага Гродна.
На тэрыторыі таксама размесцяць гарадскую плошчу, гандлёвыя рады, чыгуначны вакзал, банк, палату мер і вагаў, фотаатэлье, кінатэатр, карчму і нават рыцарскую школу.
