Будзе клёва: топ-5 месцаў для рыбалкі ў Беларусі

А калі сур’ёзна, то ў гэтым тэксце мы раскажам пра некалькі папулярных месцаў, дзе можна не толькі парыбачыць, але і атрымаць асалоду ад прыгожых беларускіх краявідаў.

Рыбных месцаў, вядома ж, хапае на рэках – Дняпры, Беразіне, Прыпяці, Сожы… Ёсць аматары парыбачыць і на Ясельдзе ці Усе. Але мы звернем увагу на вадаёмы і азёры.

Чыгірынскае водасховішча

Гэта месца лічыцца самым рыбным як мінімум у Магілёўскай вобласці. На Чыгірынку з’язджаюцца з усёй краіны, там рэгулярна праходзіць фестываль "Вялікая бард-рыбалка" – адзінае мерапрыемства такога кшталту ў краіне.

Рыбакі едуць на Чыгірынскае вадасховішча найчасцей за сомам. Але нядрэнна клюе там і шчупак, і карась, і акунь, і плотка…

Месцы там вельмі маляўнічыя, захапляцца імі можна ў тым ліку праездам па дарозе з Магілёва ў Бабруйск. Дарэчы, самыя ўдачлівыя і прадпрымальныя рыбакі прапануюць купіць нешта са свежага ўлову проста там, на трасе.

Для начлегу можна спыніцца і ў палатках на беразе вадасховішча, і ў гасцявых дамах у вёсцы Чыгірынка, якая знаходзіцца на мяжы Быхаўскага і Кіраўскага раёнаў.

Браслаўскія азёры

Ёсць такое меркаванне, што з’ездзіць "на Браславы" хоць бы раз у жыцці павінен кожны паважаючы сябе беларускі рыбак.

І справа не толькі ў тым, што азёр там вельмі шмат – Струста, Дрывяты, Снуды… Злавіць у іх можна каля 30 відаў рыбы, уключаючы ўсе самыя "папсовыя" накшталт акуня.

Праўда, варта ўлічваць, што рыбалка будзе платнай. І лепш за ўсё лішні раз праверыць на сайце нацыянальнага парка. Бо ён абнавіў цэны на пуцёўкі для аматарскай рыбалкі ў чэрвені 2026 года.

З начлегам праблем дакладна не будзе, ёсць варыянты на любы кашалёк, у тым ліку і "дзікуном". Але найлепш заняць месца на якой-небудзь турыстычнай стаянцы. Будзе не вельмі дорага, затое атрымаеце мінімальныя выгоды і, магчыма, вязанку дроў.

Вілейскае водасховішча

Гэта вадасховішча – самае вялікае ў краіне. І хоць бы дзеля гэтага ёсць падстава з’ездзіць туды і "зачэкініцца". Бывалыя рыбакі кажуць, што Вілейскае – шчодрае на ўлоў. Напрыклад, можна лёгка злавіць судака грамаў на 300–400.

Але памеры Вілейскага вадасховішча, натуральна, павінны вас падрыхтаваць і да таго, што глыбіня ў розных месцах будзе вельмі рознай. Адпаведна, і стратэгію разам са снасцямі давядзецца выбіраць па сітуацыі.

Камусьці падабаецца паклёўка на дамбе, у непасрэднай блізкасці ад платнага кемпінгу, хтосьці едзе бліжэй да выратавальнай станцыі… Іншымі словамі, месца па душы напэўна знойдзецца нават для самага пераборлівага рыбалова.

Заслаўскае водасховішча (Мінскае мора)

Туды варта з’ездзіць хоць бы дзеля "вечных" жартаў пра тое, што "ужо я-то ў моры паспеў парыбачыць". Так, гэта яшчэ адно штучнае вадасховішча, але рыбакі звычайна застаюцца задаволеныя. У тым ліку і таму, што без улову і станоўчых эмоцый дадому рэдка вяртаюцца.

Судак, лешч, шчупак, карась, лінь, уклейка – хтосьці з іх на вашу вуду дакладна павінен клюнуць. Рыбным месцам лічыцца, напрыклад, дамба. Вопытныя рыбакі па сакрэце падзяліліся, што ў Ратомскім заліве нядрэнна ловіцца краснапёрка. А ў лютым гэтага года тут злавілі шчупака на 12,5 кг!

Нарачанскі нацыянальны парк

Там вас, як і на Браславах, чакае адразу некалькі азёр, у кожнага з якіх ёсць свая "армія рыбакоў-фанатаў", якія ловяць як платна, так бесплатна.

Калі плануеце выключна рыбалку, то вашай увазе прапануюць 33 азёры і звыш 10 водаадтокаў. Можна смела ехаць на такія азёры, як Белае, Мядзел, Воўчына і Вялікія Швакшты. Там вас чакаюць акуні, вугры, налімы, судакі…

А яшчэ за адносна невысокую плату (каля 35) можна будзе атрымаць асалоду не толькі ад традыцыйнай, але і падводнай рыбалкі.

Дарэчы, калі хочаце проста адпачыць на прыродзе з палаткай, пра самыя папулярныя месцы ў Беларусі мы падрабязна расказвалі тут.

Што яшчэ можна дадаць у спіс

А ёсць і менш вядомыя месцы, дзе можна лавіць рыбу:

1. Салігорскае вадасховішча – плошча 2430 га. У 2026 годзе там правялі зарыбленне карпам, шчупаком, сомам.

2. Рыбгас "Красная Слабада" (Салігорскі раён) – платная рыбалка з магчымасцю пераначаваць у Доме рыбака з усімі выгодамі.

3. Возера Белае (Гродзеншчына) – маляўнічае месца, дзе можна сумясціць рыбалку з актыўным адпачынкам.

4. "Шчарка-Парк" (каля Мінска) – можна злавіць стронгу. Кошт білета ад 10 да 90 у залежнасці ад дня. Ёсць магчымасць пераначаваць.

Гэтыя месцы пашыраюць магчымасці для рыбакоў, асабліва тых, хто шукае новыя лакацыі для платнай рыбалкі або хоча паспрабаваць палавіць новыя віды рыбы. А знайсці рыбныя мясціны можна на спецыяльнай карце.