Некаторыя жыхары Бабруйска да гэтага часу сумуюць з-за таго, што іх любімы горад калісьці лічыўся абласным цэнтрам, а потым пазбавіўся гэтага статусу.
Афіцыйна ўсё гучыць так: Бабруйская вобласць існавала з 20 верасня 1944 года па 8 студзеня 1954-га і была скасавана для павелічэння іншых абласцей БССР.
Зараз Бабруйск – гэта самы населены райцэнтр краіны і сёмы горад Беларусі па колькасці людзей. Там жывуць больш за 200 000 чалавек. І няхай Бабруйск не мае статусу абласнога цэнтра, ён затое мае сваю іскрынку.
Распавядаем, на што звярнуць увагу ў гэтым горадзе.
Сацыялістычная вуліца
Як вядома, амаль у любым беларускім горадзе абавязкова знойдзецца вуліца Савецкая. Хутчэй за ўсё, яна будзе дзесьці ў цэнтры. І, магчыма, нават выключна пешаходная.
Калі супалі ўсе тры пункты, верагодна, вы шпацыруеце па Гродна. А вось у Бабруйску пешаходнай стала вуліца Сацыялістычная. Канешне ж, так яе называе мала хто. Часцей можна пачуць фразы "Сацыялка" і "Бабруйскі арбат".
Гэта вуліца праходзіць праз увесь "стары Бабруйск". Яна цягнецца ад кірмашу да ракі Бярэзіны.
Гадоў 100 таму па левым і правым баках размяшчаліся у асноўным крамы.
Зараз на Сацыялістычнай можна знайсці выставачную залу Бабруйскага мастацкага музея, Палац грамадзянскіх абрадаў, корпус Бабруйскага філіялу БДЭУ, Абласны тэатр драмы і камедыі імя В.І.Дуніна-Марцінкевіча, Бабруйскі краязнаўчы музей…
Помнік бабру
Скульптура Бабра Самуілавіча – асобны гонар мясцовых. Пабачыць гэтага бабра можна якраз на Сацыялцы.
Жыхары Бабруйска атрымалі гэты помнік у падарунак на "Дажынкі" ў 2006 годзе. Скульптура манументальная – важыць больш за 300 кг.
Дом-тэтрыс
Шматпавярховы дом, таксама вядомы як дом-тэтрыс і дом-шпакоўня, – яшчэ адно месца гонару для жыхароў Бабруйска, бо такіх будынкаў у Беларусі больш няма.
Паводле легенды, у сярэдзіне 1980-х, калі дом толькі ўзводзілі, яго ўбачыў малады праграміст Аляксей Пажытнаў. Менавіта ў той момант яму прыйшла ідэя стварыць гульню, якая хутка стала папулярнай ва ўсім свеце. І няхай афіцыйна стваральнік тэтрыса ніколі не пацвярджаў гэту легенду, жыхары Бабруйска не спяшаюцца адмаўляцца ад яе.
Лічыцца, што дом пабудаваны ў стылі савецкага мадэрнізму. А шпакоўняй яго часам называюць з-за характэрных круглых вокнаў.
Воданапорная вежа-рэстаран
Пабудовы з чырвонай цэглы вельмі знаёмыя многім беларусам з дзяцінства: такія воданапорныя вежы можна сустрэць у многіх райцэнтрах.
У Бабруйску вежа з'явілася ў 1927-м. Яна павінна была забяспечваць вадой усіх гараджан. У наш час там знаходзіцца рэстаран "Чырвоная вежа". Але ўнутры захавалі частку воданапорнага механізма. У інтэр'ер таксама ўпісалі стальны бак.
Побач усталявалі скульптуру Шуры Балаганава з "Залатога цяля" Іллі Ільфа і Яўгена Пятрова з крылатым выразам пра "культурны горад Бабруйск", куды любы з фэйкавых дзяцей лейтэнанта Шмідта быў гатовы адправіцца хоць зараз.
Бабруйская крэпасць
Крэпасць з'явілася ў Бабруйску ў пачатку ХІХ стагоддзя. Гэта помнік фартыфікацыйнага мастацтва, які захоўвае шмат таямніц. Напрыклад, Валянцін Пікуль распавядаў пра жудасную камеру без вуглоў.
Памяшканне было авальным. Нават ложак і столік мелі выгнутую форму. Усё гэта дзейнічала на вязняў самым жудасным чынам: толькі нямногія былі здольныя правесці там працяглы час і захаваць здаровую псіхіку.
Рэальны факт: Бабруйская крэпасць у вайне з Напалеонам гераічна трымала абарону чатыры месяцы.
У 2002-м годзе яна была ўнесена ў Дзяржаўны спіс гісторыка-культурных каштоўнасцей Беларусі.
Дом купчыхі Кацнельсон
Гэтая каларытная сядзіба, размешчаная па адрасе: вуліца Інтэрнацыянальная, 25. Яна вядома ва ўсім Бабруйску. Драўляны дом з'явіўся тут больш за 100 гадоў таму. Вуліца тады называлася Прысутнічай.
Мясцовая прадпрымальніца Пая-Брайна Кацнельсон у пачатку ХХ стагоддзя гандлявала лесам і была добра вядомай у бізнес-колах па ўсёй Расійскай імперыі.
Па легендзе гэты зялёны дом яна аднойчы ўбачыла дзесьці ў краінах Балтыі. Сядзіба ёй так спадабалася, што яна адразу яе купіла. А потым загадала разабраць і па частках перавезці ў Бабруйск.
Праўда, пажыла яна там нядоўга. Хутка жанчына пераехала ў Санкт-Пецярбург, потым здарылася рэвалюцыя, а ў будынку размясціўся павятовы рэвалюцыйны камітэт.
У пачатку ХХІ стагоддзя нейкі час у сядзібе размяшчалася бібліятэка, а сёння там прапісалася рэкламнае агенцтва.
А якія яшчэ цікавыя сядзібы можна наведаць у Беларусі, мы расказвалі раней у гэтым тэксце.
