У Беларусі рэгіянальныя аэрапорты могуць атрымаць новы імпульс для развіцця.
Прадстаўнікі Нацыянальнага агенцтва па турызме і "Белаэранавігацыі" абмеркавалі перспектывы прыцягнення турыстаў праз аэрапорты Гомеля, Брэста, Віцебска і Гродна, піша sb.by.
Якія задачы стаяць цяпер
Яшчэ 7 жніўня дырэктар Нацыянальнага агенцтва па турызме Кірыл Машарскі наведаў ДП "Белаэранавігацыя". На сустрэчы з кіраўніцтвам прадпрыемства абмяркоўвалася дынаміка развіцця абласных аэрапортаў у кантэксце прыцягнення ўязнога турызму.
Як адзначыла начальнік аддзела развіцця аэрапортаў Марына Хлебус, аэрапорты Гомеля, Брэста, Віцебска і Гродна ўжо актыўна працуюць у міжнародных авіязносінах – перш за ўсё ў рэйсах у Расію і чартарных перавозках на курорты.
Такое размеркаванне рэйсаў зніжае нагрузку з Мінска і адначасова прыцягвае падарожнікаў у розныя рэгіёны краіны.
Асаблівы ж акцэнт на сустрэчы зрабілі на аэрапорце Гродна. Так, у канцы 2025 года тут адрамантавалі ўзлётна-пасадачную паласу, і цяпер галоўная задача – падтрымліваць інфраструктуру ў выдатным стане, каб быць гатовымі да новых рэйсаў.
"Цяпер у фокусе ўвагі – пошук авіяперавозчыкаў, гатовых аднавіць рэгулярныя палёты з Гродна. У прыярытэце – рэйсы ў Маскву і Калінінград, а таксама сезонныя напрамкі на поўдзень Расіі: Краснадар і Сочы", – раскрыла падрабязнасці Марына Хлебус.
Чаму гэта важна
Развіццё рэгіянальных аэрапортаў – частка стратэгіі па пашырэнні турыстычнага патэнцыялу Беларусі. Паспяховае прыцягненне перавозчыкаў у Гродна і іншыя гарады дазволіць не толькі павялічыць пасажырапаток, але і зрабіць рэгіёны больш даступнымі для замежных і ўнутраных турыстаў.
Паводле слоў прадстаўнікоў "Белаэранавігацыі", яно, як прадпрыемства па аэранавігацыйным абслугоўванні, гатова забяспечваць бяспеку і рэгулярнасць палётаў. У той жа час Нацагентства па турызме выказала поўную гатоўнасць прасоўваць новыя маршруты.
Зрэшты, дакладныя тэрміны рэалізацыі праектаў пакуль не называюцца.
