На Плошчы лаўрэатаў Летняга амфітэатра з'явіліся дзве новыя пліты з імяннымі "валошкамі". У юбілейны год фестывалю спецыяльнай прэміі Прэзідэнта Беларусі ўдастоены адразу два дзеячы культуры, піша БелТА.
Лаўрэатамі сталі 100-гадовы народны артыст Расіі Аляксандр Зацэпін, чыя музыка гучыць у легендарных савецкіх камедыях Гайдая, і аўтар гімна "Славянскага базару", народны артыст Беларусі Леанід Захлеўны.
Зацэпін падзякаваў за высокую ўзнагароду і прызнаўся, што яму вельмі прыемна атрымаць яе ў Беларусі.
"Вельмі прыемна, што сёння мне ўручылі гэту прэмію. Я перад гэтым хваляваўся, думаў, як жа гэта будзе прыемна – атрымліваць такую ўзнагароду. У Беларусі я бываў шмат разоў – у Мінску. І ў вашым чыстым, прыемным горадзе два гады таму быў на фестывалі. Было прыемна, калі вы мне апладзіравалі на канцэрце, адчуваў вялікае задавальненне, атрымаў асалоду. Вялікі дзякуй і людзям, якія паклапаціліся аб тым, каб я атрымаў гэту ўзнагароду", – сказаў Аляксандр Зацэпін.
Захлеўны адзначыў, што яго песні нараджаюцца хутка і шчыра, а гімн фестывалю зрабіў яго вядомым. Ён паабяцаў і далей услаўляць Беларусь сваёй творчасцю.
"У гэтай зорцы ёсць часцінка і маіх настаўнікаў, якія мяне навучылі не толькі пісаць музыку, але і любіць беларускую зямлю, на якой жывуць таленавітыя людзі, якія ад душы спяваюць і гэтак жа з душой працуюць. Думаю, што і ў далейшым буду пісаць шчыра, натхнёна, услаўляючы нашу любімую Беларусь", – перадае БеЛТА яго словы падзякі.
