Праехацца з экскурсіяй па гарадах Беларусі можна і на цягніку. Пра турыстычныя чыгуначныя маршруты расказалі ў прэс-службе Беларускай чыгункі.
Па Беларусі на цягніку
Лошыцкая сядзіба. У гэты чыгуначны тур з абласных гарадоў уваходзіць знаёмства з архітэктурай і інтэр'ерамі Лошыцкай сядзібы і арт-прасторай дома Угрыновіча. У гэтым атмасферным месцы можна выпіць кубачак духмянай кавы з вытанчаным дэсертам, а пазней прагуляцца па Ракаўскім прадмесці.
Беларускі праванс. Маршрут абяцае наведванне лавандавай фермы на Гомельшчыне, экскурсію ў Палац Румянцавых-Паскевічаў і прагулку на цеплаходзе па рацэ Сож.
На фоне лавандавых палёў можна ўладкаваць фотасесію, забраць на памяць букет лаванды, а таксама палюбавацца на квітнеючую юку.
"Жамчужыны Беларусі". Гэты экскурсійны тур, запушчаны амаль год таму і карыстаецца асаблівай папулярнасцю ў расійскіх турыстаў.
На цягніку Масква – Гомель – Магілёў – Шклоў – Александрыя турысты наведаюць Гомельскі палацава-паркавы ансамбль, у Магілёве ўбачаць старажытныя фрэскі кафедральнага касцёла Унебаўзяцця Дзевы Марыі і Святога Станіслава і Свята-Мікалаеўскага жаночага манастыра, а таксама пабываюць на Буйніцкім полі.
У праграму ўваходзіць таксама наведванне аграгарадка Александрыя – малой радзімы прэзідэнта Беларусі. Там можна будзе зайсці ў школу, дзе вучыўся Аляксандр Лукашэнка, а таксама пабываць на знакамітай Трафімавай крыніцы з лекавай вадой.
"Беларускі ваяж". Турыстычны цягнік Масква – Гродна/Брэст – Мінск – Масква прапануе самыя розныя праграмы. У іх уваходзіць наведванне Мірскага і Нясвіжскага замкаў, Брэсцкай крэпасці, а таксама Белавежскай пушчы.
Навінка гэтага года – прагулка на цеплаходзе па Аўгустоўскім канале, экскурсія на БелАЗ, Мінскі трактарны завод і фабрыку "Камунарка".
Музей і парк жывёл. Гаворка ідзе пра чыгуначнае падарожжа Віцебск – Баранавічы – Віцебск з наведваннем Музея чыгункі ў Баранавічах і зоа-ландшафтнага парку жывёл. Там можна ўбачыць каля 100 відаў жывёл і птушак, у тым ліку экзатычных.
А які маршршрут прапанавалі б вы? Пішыце нам на info@tochka.by, а мы прапануем вашыя ідэі іншым чытачам.
