У Нацыянальнай бібліятэцы Беларусі (НББ) адкрылася кніжна-ілюстрацыйная выстава "Крыніцы любові да роднай зямлі". Пра гэта паведамілі ў прэс-службе ўстановы, піша БелТА.
Выстава пазнаёміць з жыццём і творчым шляхам аўтараў, якія пакінулі яркі след у гісторыі беларускай літаратуры.
Экспазіцыя прымеркавана да 150-годдзя з дня нараджэння Цёткі (Алаізы Пашкевіч) і 175-годдзя Янкі Лучыны (Івана Неслухоўскага). Тут сабрана каля 120 дакументаў з фондаў Нацыянальнай бібліятэкі. Сярод экспанатаў ёсць прыжыццёвыя і першыя пасмяротныя выданні твораў, лістоўкі, копіі дакументаў, якія захоўваюцца ў іншых краінах.
"Мы паспрабавалі дапоўніць нашу экспазіцыю копіямі фотаздымкаў і дакументаў, якія былі апублікаваны на старонках розных выданняў і прысвячаліся жыццёваму шляху гэтых аўтараў", – заявілі ў аддзеле арганізацыі кніжных выставак НББ.
Там жа адзначылі, што сярод рэдкіх выданняў ёсць "Паўночна-заходні каляндар" 1893 года. Тут былі ўпершыню надрукаваны беларускамоўныя вершы Янкі Лучыны.
Яшчэ ў экспазіцыі прадстаўлены рэдкія выданні Цёткі, у асноўным прысвечаныя яе творчасці для дзяцей і моладзі.
Арганізатары выставы таксама адзначылі, што нездарма "вырашылі аб'яднаць гэтых дзвюх асоб". І Цётка, і Янка Лучына належаць да аднаго перыяду ў гісторыі беларускай літаратуры, які ў свой час называўся новай беларускай літаратурай. Іх творчасць аб'яднана любоўю да народа і сялян.
З якога ўзросту запісваюць у Нацыянальную бібліятэку
Атрымаць чытацкі білет у Нацыянальнай бібліятэцы Беларусі можна з пэўнага ўзросту. Аднак ёсць выключэнні, расказваў генеральны дырэктар НББ Вадзім Гігін.
Запісацца ў Нацыянальную бібліятэку можна з 14 гадоў. Пры гэтым такая магчымасць даступная не толькі для беларусаў, але і для іншаземцаў. Па ўзросце бываюць выключэнні.
Генеральны дырэктар адзначаў, што ў "Нацыяналцы" ёсць чытачы самых розных узростаў. Запісваюць нават школьнікаў, маленькіх вундэркіндаў.
У Нацыянальную бібліятэку можна прыходзіць не толькі дзеля чытання. Напрыклад, тут не так даўно з'явіўся дзіцячы чытальны зал. У ім праводзяць мерапрыемствы для юных пісьменнікаў.
Сюды прыходзяць дзеці сямі-васьмі гадоў, якія ўжо спрабуюць сябе ў напісанні вершаў і апавяданняў. Яны могуць у поўнай меры адчуць атмасферу творчасці.
Генеральны дырэктар НББ таксама расказваў, што сярод адданых чытачоў ёсць тыя, хто наведвае "дыямент ведаў" большую колькасць разоў, чым дзён у годзе. Ім па распрацаванай праграме лаяльнасці 16 чэрвеня ўручылі залатыя і срэбныя білеты чытача Нацыянальнай бібліятэкі Беларусі.
