Купалаўскі тэатр парадаваў гледачоў яркімі праектамі і цяпер рыхтуе новыя гучныя прэм'еры.
Ва ўстанове культуры падвялі вынікі завершанага 106-га сезона і агучылі, чым будуць здзіўляць з восені, пішуць "Мінск-Навіны".
Перыяд запомніцца бліскучымі прэм'ерамі і насычанымі гастролямі. За 106-ы сезон прайшло больш за 280 паказаў рэпертуарных спектакляў, якія сабралі ў агульнай суме звыш 45 700 гледачоў.
Адбыліся і эксперыменты, якія сталі працягам традыцыі супрацоўніцтва з маладымі беларускімі пісьменнікамі.
Так, было прадстаўлена тэатралізаванае чытанне "Вырай. Чытка" ў пастаноўцы Іллі Крука паводле рамана "Вырай" Вікторыі Кляўко. Упершыню чытка ўвайшла ў рэпертуар нароўні са спектаклямі і размяшчалася ў ім на працягу сезона.
Таксама гледачы з захапленнем прынялі камедыю "Гэта цудоўнае жыццё", якая запрасіла іх у закуліссе тэатра, і атмасферу неануара "Замак Альшанскі" паводле рамана Уладзіміра Караткевіча з дзіўнымі дэкарацыямі народнага мастака Беларусі Барыса Герлавана.
Чым будуць здзіўляць далей
Наперадзе яшчэ шмат яркіх праектаў. Новы сезон у Купалаўскім тэатры адкрыецца 1 верасня.
Першай прэм'ерай гэтай восені стане спектакль "Сэрца на далоні" паводле рамана Івана Шамякіна. Пастаноўку рэжысіруе Дзмітрый Акімаў.
Тэатр плануе таксама і іншыя гучныя прэм'еры, калабарацыі, гастролі па гарадах Беларусі і за яе межамі.
Як адзначылі ва ўстанове, чакаюцца ў тым ліку новыя формы ўзаемадзеяння з гледачамі, аднак падрабязнасці пакуль не раскрываліся.
Дарэчы, раней у Купалаўскім кожны месяц сталі праходзіць зборныя гістарычныя экскурсіі і загадкавае закуліссе.
Перад пачаткам сезона, на працягу апошняга тыдня лета, купалаўцы прымуць удзел у "Купала. Лабараторыя" і разам з выдатнымі рэжысёрамі звернуцца да класічнай беларускай драматургіі.
