Праз доўгі час Арына Сабаленка вырашыла завітаць у родную Беларусь. У Мінску яна пабывае на адкрыцці грунтавых тэнісных кортаў Tigerhood х First&Red.
Іх размясцілі на тэрыторыі роднай школы Сабаленка.
"Канцэпцыя кортаў натхнёная характарам Арыны: сілай, грацыяй і вобразам тыгрыцы, які даўно стаў яе сімвалам", – сказана ў паведамленні Telegram-канала First&Red.
У дзень адкрыцця, 14 ліпеня, Арына правядзе майстар-клас для юных тэнісістаў, пагутарыць з гасцямі і раздасць аўтографы.
На жаль, наведаць мерапрыемства можна толькі па рэгістрацыі, а яе закрылі вельмі хутка. Ахвотных сустрэцца са спартсменкай аказалася занадта шмат.
У топ-100 самых уплывовых людзей спорту
Беларуска трапіла ў спіс са 100 найбольш уплывовых людзей 2026 года ад амерыканскага часопіса Time. Акрамя спартсменаў, у прэстыжны рэйтынг трапілі прадстаўнікі палітыкі, музыкі, а таксама лідары меркаванняў.
Сёлета рэдакцыя выдання падзяліла сто персон на чатыры катэгорыі: іконы, тытаны, наватары і лідары.
Да ліку лідараў эксперты аднеслі першую ракетку свету, беларускую тэнісістку Арыну Сабаленка.
А ў красавіку 2026 года Арына Сабаленка была прызнаная спартсменкай года па версіі прэстыжнай прэміі Laureus World Sports Awards.
У 2025 годзе першая ракетка свету стала пераможніцай Адкрытага чэмпіянату ЗША, турніраў катэгорыі WTA 1000 у Маямі і Мадрыдзе, а таксама "пяцісотніка" ў Брысбене.
