З 31 ліпеня па 18 кастрычніка ў музеі-запаведніку "Царыцына" ў рамках праекта "Ненаіўнае наіўнае. Мастацтва па-за правіламі" будзе працаваць сатэлітная выстава, дзе галоўнае месца займуць традыцыйныя беларускія маляванкі, якія ўжо паспелі назваць "распісныя насценныя дыванкі", піша БелТА.
Як расказалі ў Віцебскім абласным метадычным цэнтры народнай творчасці, у Маскву павязуць каля дваццаці арыгінальных работ з фондаў цэнтра. Расійскія гледачы ўбачаць іх упершыню – раней гэтыя работы нідзе не экспанаваліся.
Што такое маляванкі?
Гэта ўнікальны від народнага мастацтва, які бярэ пачатак з вышыўкі, ткацтва і роспісу куфраў. З часам майстры знайшлі прасцейшы спосаб упрыгожваць хату. І замест доўгай і карпатлівай працы з іголкай ці станком абралі яркія фарбы на палатне.
Росквіт гэтага напрамку прыпаў на 1920-1960-я гады, калі пасля актыўнай перабудовы вёскі людзі пачалі больш увагі надаваць хатняму інтэр’еру. Маляванкі распісвалі алейнымі або клеявымі фарбамі, які часта гатавалі дома, выкарыстоўвалі набойку ці трафарэт.
Чым знакамітыя віцебскія маляванкі
Паводле слоў мастацкага кіраўніка цэнтра Вольгі Сергіенка, віцебскія работы маюць свае характэрныя рысы. Тут пераважаюць буйныя кампазіцыі з букетамі ў вазах ці кашолках, перавязаных стужачкай. Часта сустракаюцца выявы птушак і жанравыя сцэны з людзьмі.
Асабліва моцна гэтая традыцыя развівалася ў Віцебскай і Мінскай абласцях. Значны ўклад у яе ўнес вядомы мастак-прафесіянал Язэп Драздовіч.
Выстава ў "Царыцыне" будзе працаваць да 18 кастрычніка. Усе жадаючыя змогуць убачыць сапраўдныя беларускія маляванкі, якія доўгія гады захоўваліся ў фондах.
