У Беларусі экстрэмісцкім фарміраваннем прызналі праект "ЧынЧынЧэнэл". Ён з’явіўся ў адпаведным спісе па рашэнні МУС.
Пад забарону трапіў не толькі YouTube-канал, на якім выйшаў вядомы многім кліп "Шчучыншчына", але і ўсе рэсурсы, уключаючы групы ў Telegram, уліковыя запісы ў Threads, TikTok, Instagram і Facebook, а таксама стыкеры.
У спісе таксама апынуліся канкрэтныя людзі – Дзмітрый Ясеневіч, Міхаіл Зуй і Сяргей Навіцкі. Былыя акторы Купалаўскага тэатра Зуй і Ясеневіч парадыравалі ў роліках беларускіх чыноўнікаў праз персанажаў Сяргея Мікалаевіча і Мікалая Сяргеевіча.
Крымінальная адказнасць толькі за падпіску
Нагадаем, дакумент з пералікам экстрэмісцкіх фарміраванняў рэгулярна абнаўляецца на сайце МУС. На дадзены момант у ім больш за 360 пазіцый – ад шырока вядомых праектаў тыпу NEXTA або "Палка Каліноўскага" да групы Xinkalik у дадатку Zello.
Для ўнясення ў спіс экстрэмісцкіх фарміраванняў судовы вердыкт неабавязковы. Рашэнне прымае МУС альбо КДБ.
У дадзеным выпадку прадугледжана крымінальная адказнасць. І не толькі для арганізатараў і адміністратараў.
Падпісчыкі такіх супольнасцяў будуць прыцягнуты да адказнасці паводле артыкула 361-1 Крымінальнага кодэкса Беларусі як удзельнікі экстрэмісцкага фарміравання. Пакаранне паводле такога артыкула – да сямі гадоў турмы.
А, напрыклад, рэпаст любога паста ці роліка з забароненага рэсурсу кваліфікуецца як дзейнасць, якая дапамагае экстрэмісцкаму фарміраванню.
