Карацей кажучы
-
Лідары двух краін некалькі разоў размаўлялі па тэлефоне, а ў Беларусь ужо чатыры разы за апошні год прыязджалі амерыканскія дэлегацыі. Трамп жа заяўляў, што адчувае павагу да беларускага лідара.
-
Тым не менш, Лукашэнка адзначыў, што сустрэча дзеля сустрэчы яго не цікавіць. Перад ёй патрэбна прапрацаваць пытанні перамоваў. Яны будуць тычыцца не толькі вызвалення вязняў.
-
Прэзідэнты могуць сустрэцца на бліжэйшым паседжанні Савета міра. На адкрыццё арганізацыі павінна была паехаць дэлегацыя беларускага МЗСу, але ў яе ўзніклі праблемы з афармленнем дакументаў. Сам жа Лукашэнка на той момант сачыў за ходам праверкі боегатоўнасці.
Лукашэнка адзначыў, што не выключае сустрэчу з Трампам. Яго запрасілі на наступную сустрэчу Савета міра, якая павінна прайсці восенню.
Тым не менш, прэзідэнт заявіў, што перад магчымымі перамовамі важна падрыхтавацца, каб па выніку выйсці на канкрэтныя рашэнні.
"Перш чым сустракацца з кімсьці, асабліва калі кіраўнікі дзяржаваў сустракаюцца, трэба разумець, што будзе ў выніку. Што, з Дональдам Трампам сустрэўшыся, мы зможам склеіць, зварыць. Каб людзі атрымалі адказ: ну сустрэліся, і што?" – патлумачыў сваю пазіцыю Лукашэнка.
Не толькі вызваленне вязняў
Разам з тым, кіраўнік Беларусі не разлічвае на вырашэнне нейкіх глабальных пытанняў.
"Але гэта будуць дамоўленасці (у тым ліку на аснове кампрамісаў), каб развязаць нейкія вузлы, якія ў апошні час створаныя паміж дзвюма дзяржавамі, каб зрабіць так, каб палепшыць нашыя стасункі. Мы гатовыя да гэтага. І амерыканцы, і мы гатовыя стварыць гэтыя ўмовы", – сказаў Лукашэнка.
Сярод пытанняў, якія плануецца абмеркаваць, кіраўнік Беларусі назваў адкрыццё амбасадаў, эканамічныя і фінансавыя тэмы, а не толькі вызваленне вязняў.
"У нас шмат пытанняў. Гэтыя пытанні павінны быць у адным пакеце. І ў выніку сустрэчы двух прэзідэнтаў павінны быць калі не дамоўленасці, то хоць бы намёкі на развязку гэтых пытанняў", – рэзюміраваў Лукашэнка.
Беларусь і ЗША: гісторыя перамоваў
Аляксандр Лукашэнка чатыры разы сустракаўся з дэлегацыяй ЗША. Упершыню гэта адбылося ў ліпені 2025 года. Пасля перамоваў былі вызваленыя 14 чалавек, у тым ліку беларускі апазіцыянер Сяргей Ціханоўскі.
Наступная сустрэча адбылася восенню. Тады стала вядома, што на волю выйшлі 52 вязні. Усяго памілавалі 38 беларусаў і 14 замежнікаў. Пасля той сустрэчы ЗША знялі санкцыі з авіякампаніі Belavia.
Затым у Беларусь 13 снежня 2025 года прыехаў Джон Коўл. Пасля гэтага ЗША знялі санкцыі з беларускага калію, а 123 чалавекі былі вызваленыя. Сярод іх аказаліся: Віктар Бабарыка, Максім Знак, Марына Золатава, Аляксандр Фядута, Павел Севярынец.
Апошні візіт адбыўся 19 сакавіка 2026 года. Пасля гэтай сустрэчы былі вызваленыя 250 чалавек. Раней іх асудзілі за злачынствы экстрэмісцкай накіраванасці.
А з боку Штатаў былі знятыя санкцыі з Белінвестбанка, Банка развіцця і Міністэрства фінансаў Беларусі. Са спісаў выключылі і "Беларуськалій".
У канцы красавіка 2026 года пры падтрымцы амерыканцаў з Беларусі змог выехаць польскі журналіст Анджэй Пачобут. Разам з ім выехалі яшчэ двое грамадзянаў Польшчы і двое чалавек з Малдовы. За гэта Польшча перадала грамадзянаў Беларусі, Расіі і іншых дзяржаў СНД.
