Лукашэнка загаварыў аб вяртанні "кіруючай ролі кампартыі" ў Беларусі

Аляксандр Лукашэнка зноў загаварыў аб вяртанні да савецкай мадэлі кіравання.

Падчас рабочай паездкі ў Брэсцкую вобласць ён падняў пытанне аб аднаўленні "кіруючай, накіроўваючай ролі кампартыі", прызнаўшыся, што пакуль не ведае, як гэта зрабіць.

"Мы шмат страцілі"

Галоўны тэзіс прэзідэнта – настальгія па савецкай сістэме кадравага кіравання. Ён параўнаў Беларусь з Кітаем, у якім "нічога не ламалі і не адмаўлялі", таму ён дасягнуў поспехаў.

На гэтым фоне Лукашэнка прызнаўся:

"А мы сёння думаем, як аднавіць кіруючую, накіроўваючую ролю кампартыі. Саўчыца бяром сакратаром абкама. А хто? Ён – вопыт, ён памятае гэта".

Пры гэтым ён адзначыў, што нават яго прэс-сакратар Наталля Эйсмант, якая "не ведае, як выйсці на гэта", разумее маштаб страт:

"Але нават яна, маладая дзяўчына, разумее, што мы шмат страцілі. Кіруемасці няма той. Кадравай, галоўнае, палітыкі няма. А яна адтуль пачыналася, з райкамаў. Сёння гэтага няма".

Завяршаючы думку, Лукашэнка задаўся рытарычным пытаннем:

"А навошта мы гэта разбурылі? А чаму Захад перш за ўсё патрабаваў ад нас шосты артыкул Канстытуцыі прыбраць? Памятаеш? А чаму? Таму што яна вызначала кіруючую і накіроўваючую ролю партыі. Але як да гэтага вярнуцца? Пытанне".

Нагадаем, гэта не першая падобная заява. Яшчэ ў красавіку 2026 года Лукашэнка казаў аб магчымасці "правесці рэформу кіравання дзяржавай, выкарыстоўваючы вопыт старога" і крытыкаваў "заходнікаў", якія, паводле яго слоў, раілі Беларусі адмовіцца ад аднапартыйнай сістэмы.