Прэзідэнт Беларусі Аляксандр Лукашэнка 13 жніўня наведаў палі агракамбіната "Ждановічы", каб асабіста падзякаваць перадавікам жніва за працу.
У Мінскай вобласці ўжо абмалацілі 2 млн т збожжа, і ў гонар гэтага кіраўніку дзяржавы падарылі сімвалічны сноп, паведамляе president.gov.by.
"З прыцэлам на тры мільёны", – адказаў Аляксандр Лукашэнка, прымаючы падарунак.
У перадавіка – ужо 5 тыс. т
У ліку перадавікоў – Павел Шуціла, Віталій Кішко і Андрэй Аляксейчык. Гэта спецыялісты ААТ "Кухчыцы" Клецкага раёна. Адпрацаваўшы на ўборцы там, цяпер яны дапамагаюць убіраць ураджай з палёў агракамбіната "Ждановічы".
Камбайнер Павел Шуціла ў пачатку жніўня першым у Беларусі абмалаціў 4 тыс. т збожжа, а да цяперашняга часу пераадолеў адзнаку 5 тыс. т, піша БелТА.
Віталій Кішко працуе на адвозцы ўраджаю. За цяперашнюю ўборачную кампанію ён ужо перавёз больш за 6,1 тыс. т збожжавых, зернебабовых і рапсу, пабіўшы свае ранейшыя рэкорды.
А Андрэй Аляксейчык, які ў 2025-м перавёз 7,7 тыс. т збожжа, у гэтым годзе ўдзельнічае ў жніве як адказны спецыяліст за арганізацыю ўборачнай.
Аляксандр Лукашэнка ўручыў кожнаму ключы ад новых аўтамабіляў BELGEE.
І звярнуўся да работнікаў з просьбай дапамагчы ў стварэнні рэзерву маладых спецыялістаў, каб перадавікоў было яшчэ больш.
"Вы малайцы. Але не гэта галоўнае. Галоўнае, каб такіх, як вы, па дзве сотні было", – адзначыў прэзідэнт.
Раней Лукашэнка даручыў накіроўваць у армію тых, хто дрэнна сябе паказвае падчас уборачнай кампаніі. Кіраўнік дзяржавы патлумачыў, што не збіраецца здзекавацца над людзьмі, а дае ім шанец праявіць сябе.
