Урад змяніў правілы назначэння і выплаты дапамог па доглядзе за інвалідамі I групы і асобамі старэйшымі за 80 гадоў. Адначасова навацыі закранулі і атрымальнікаў дапамогі па доглядзе за дзіцем да трох гадоў.
Адпаведную пастанову падпісаў прэм'ер-міністр Аляксандр Турчын.
Што мяняецца для бацькоў дзяцей з інваліднасцю
Цяпер для іх будзе забяспечаны "бясшвоўны" пераход у забеспячэнні сацыяльнай падтрымкай пры дасягненні дзіцем-інвалідам 18 гадоў.
Гэта значыць, што пасля паўналецця дзіцяці выплата дапамогі па доглядзе не перарвецца. Бацькі або апекуны, якія атрымліваюць дзяржаўную пенсію, захаваюць права на гэту дапамогу. Але ёсць умова: той, хто даглядае, не павінен быць інвалідам I групы.
Таксама мяняецца і парадак назначэння дапамогі. Калі пасля 18-годдзя дзіцяці ўпершыню паставяць дыягназ інваліднасць I групы, дапамогу назначаць не з даты падачы заявы, а з даты ўстанаўлення інваліднасці.
Пры гэтым напісаць яе трэба на працягу месяца пасля афармлення заключэння медыка-рэабілітацыйнай экспертнай камісіі.
Ці захаваецца дапамога пры шпіталізацыі
Па новых правілах – так. Калі чалавек, які мае патрэбу ў пастаянным доглядзе, трапіць у бальніцу, дапамогу працягнуць выплачваць.
Але толькі ў тым выпадку, калі апякун па-ранейшаму будзе клапаціцца пра яго падчас лячэння. Гэта трэба пацвердзіць дакументамі з установы аховы здароўя.
Што будзе, калі часова спыніць догляд
У дакуменце замацавалі магчымасць часова перарваць догляд без страты права на дапамогу.
Калі ў чалавека, які даглядае інваліда або іншага недзеяздольнага грамадзяніна, узнікнуць асабістыя абставіны, ён зможа ўзяць паўзу на тэрмін да 14 дзён.
Галоўная ўмова – перапынак павінен быць узгоднены з чалавекам, за якім ажыццяўляецца догляд.
У гэтым выпадку выплату не адменяць, а толькі часова прыпыняць. Пасля вяртання да догляду нанава праходзіць працэдуру назначэння дапамогі і збіраць дакументы не давядзецца.
Змены для бацькоў у дэкрэтным водпуску
Круг тых, хто можа атрымаць дапамогу, пашырылі.
Цяпер яе змогуць аформіць бацькі, якія вучацца на дзённай форме альбо праходзяць вочную клінічную ардынатуру.
Раней такое права было толькі ў тых, хто аформіў водпуск па доглядзе дзіцяці да трох гадоў па месцы працы або ваеннай службы.
Калі выплаты могуць спыніць
Адначасова ўрад пашырыў пералік падстаў для спынення выплаты дапамогі.
Цяпер яе змогуць адмяніць, калі чалавек, за якім ажыццяўляецца догляд, больш не мае патрэбы ў пастаяннай старонняй дапамозе.
Выплату таксама спыняць, калі ў атрымальніка дапамогі – замежнага грамадзяніна або асобы без грамадзянства – скончыцца тэрмін дзеяння дазволу на пастаяннае пражыванне ў Беларусі.
