У Беларусі прапануюць скарэкціраваць парадак працы з персанальнымі дадзенымі.
Калі законапраект прымуць, у шэрагу выпадкаў кампаніям больш не давядзецца запытваць згоду грамадзян на іх апрацоўку.
Дакумент ужо вынеслі на грамадскае абмеркаванне, паведамляе Myfin.
Калі згода не спатрэбіцца
Законапраект прадугледжвае пашырэнне пераліку выпадкаў, калі персанальныя дадзеныя можна будзе апрацоўваць без асобнай згоды грамадзян.
Так, кампаніі змогуць абыходзіцца без яе пры разглядзе рэзюмэ, выкананні дагавораў у інтарэсах трэціх асоб, працы з дакументамі, атрыманымі па электроннай пошце, публікацыі выяў на сваіх сайтах і перадачы персанальных дадзеных за мяжу.
Адначасова прапануецца зрабіць прасцейшай і саму працэдуру атрымання згоды, скараціўшы аб'ём абавязковай інфармацыі для грамадзян.
Што яшчэ можа змяніцца
Законапраект прадугледжвае і шэраг іншых новаўвядзенняў. Так, звесткі аб членстве ў прафсаюзах плануецца выключыць з катэгорыі спецыяльных персанальных дадзеных.
Акрамя таго, прапануюць па-новаму ўрэгуляваць сумесную апрацоўку персанальных дадзеных некалькімі арганізацыямі, прывесці да адзінага парадку тэрміны разгляду зваротаў грамадзян і спрасціць унутраны кантроль за апрацоўкай дадзеных для малога бізнесу і холдынгаў.
Асобны блок змен тычыцца сучасных тэхналогій. Прапануецца ўзмацніць абарону персанальных дадзеных пры выкарыстанні сістэм відэаназірання, аўдыязапісу і аўтаматызаванай апрацоўкі інфармацыі.
Дзе і калі можна выказацца
Грамадскае абмеркаванне законапраекта пройдзе з 13 па 22 ліпеня.
За гэты час усе жадаючыя змогуць пакінуць свае заўвагі і прапановы на беларускім прававым форуме ў адмысловым раздзеле.
