У Беларусі пачалі прызываць ухілістаў-аграрыяў – ужо набралі батальён

Зборы з прызывам ваеннаабавязаных стартавалі ў адным са злучэнняў сіл спецыяльных аперацый, паведамілі ў Telegram-канале Міністэрства абароны.

Аднак у гэты раз прызыў закрануў пэўную катэгорыю грамадзян. Як удакладнілі ў ваенным ведамстве, зборы арганізаваны па даручэнні прэзідэнта.

Аляксандр Лукашэнка раней заявіў, што ў армію будуць прызываць работнікаў і кіраўнікоў сельскагаспадарчых прадпрыемстваў, якія дрэнна выконвалі свае абавязкі падчас уборачнай.

Прэзідэнт даручыў міністру абароны Віктару Хрэніну накіроўваць "усіх, хто не ўмее працаваць, у армію і на паўднёвую мяжу, у лес".

Пазней кіраўнік дзяржавы патлумачыў, што не збіраецца здзекавацца над людзьмі, а дае ім магчымасць праявіць сябе.

Чым зоймуцца нядаўнія аграрыі

Цяперашнія зборы могуць працягвацца да 60 сутак. За гэты час з ваеннаабавязанымі правядуць заняткі па аднаўленні ваенна-прафесійных навыкаў і накіруюць у раёны выканання вучэбна-баявых задач.

Беларусаў размеркаваюць па падраздзяленнях, а ў далейшым з іх сфарміруюць стралковы батальён.

"На палігоне з ваеннаабавязанымі будуць праводзіцца заняткі па асноўных прадметах баявой падрыхтоўкі, якія забяспечваюць жывучасць ваеннаслужачых і захаванне баяздольнасці падраздзялення ў цэлым: агнявая, інжынерная і ваенна-медыцынская падрыхтоўка", – заявілі ў Мінабароны.

Таксама запланаваны сутачныя заняткі з правядзеннем як у светлы час сутак, так і ва ўмовах абмежаванай бачнасці.

За час збораў ваеннаабавязаныя абновяць свае веды, якія атрымалі пад час праходжання тэрміновай службы, і пазнаёмяцца з новымі відамі ўзбраення.