У Threads зноў разгарэлася моўная дыскусія – на гэты раз вакол спрадвечнай беларускай стравы.
Карыстальніца пад нікам @snimaii з Бярозы (Брэсцкая вобласць) падзялілася рэцэптам: адвараную бульбу таўкуць, змешваюць з абсмажаным лукам і скваркамі, фармуюць "пірог" на патэльні і запякаюць да залацістай скарыначкі.
Зверху страва пакрывалася апетытнай "пігарачкай" – так пяшчотна ў яе сям'і называлі тую самую хрумсткую скарыначку. Саму ж страву ў іх мясцовасці называлі таўканіцай ці таўкеняй.
Далей пачалося самае цікавае. Усяго за пару гадзін пад пастом сабралася амаль 200 каментароў з рознымі мясцовымі назвамі. Вось некалькі прыкладаў:
-
Чачоха – Аршанскі раён (Віцебская вобласць)
-
Комы – Глускі раён (Магілеўская вобласць)
-
Камы – Барысаўскі раён (Мінская вобласць) і Карэлічы (Гродненская вобласць)
-
Камякі – Любанскі раён (Мінская вобласць) і Баранавічскі раён (Брэсцкая вобласць)
-
Каша – таксама сустрэлася сярод варыянтаў, але без удакладнення рэгіёну.
Аднаго з карыстальнікаў пад нікам rimsky01 дыскусія так натхніла, што ён пайшоў гатаваць страву, а пасля яшчэ і даслаў фота.
Праўда, першы "блін" атрымаўся крыху бледным і каментатары параілі ў наступны раз даводзіць скарыначку (пігарачку) да яркай румянасці.
"Ох, і што ты будзеш рабіць?" – пытаецца natalia.skorina.expert, якая пасля дыскусіі не стрымалася і пайшла гатаваць страву ў бабулінай печы.
Гэтая аднаўленчая дыскусія – яшчэ адзін доказ таго, што нават простая страва можа захоўваць гісторыю і каларыт рэгіёну.
А як называлася яна ў вас? Пішыце нам на info@tochka.by.
А раней Tochka.by расказвала, як па-рознаму ў рэгіёнах называлася ірга.
