Брытанскае выданне Times Higher Education абнавіла штогадовы рэйтынг найлепшых універсітэтаў свету на 2027 год – The World University Rankings.
Ён лічыцца адной з самых аўтарытэтных крыніц у ранжыраванні вышэйшай адукацыі.
У абноўленую табліцу ўвайшлі два беларускія ўніверсітэты. Прычым для аднаго з іх гэта адбылося ўпершыню ў гісторыі.
Гаворка ідзе пра Беларускі дзяржаўны медыцынскі ўніверсітэт. БДМУ заняў пазіцыю ў групе 2001+, паведамілі ў прэс-службе ўніверсітэта.
Раней універсітэт ужо быў прадстаўлены ў The World University Rankings, але толькі ў катэгорыі reporter. У яе ўваходзяць універсітэты, якія прадастаўляюць даныя для рэйтынгу, але пакуль не адпавядаюць усім патрабаванням для атрымання месца ў асноўнай табліцы.
У 2026 годзе ўніверсітэт выканаў неабходныя ўмовы і ўпершыню перайшоў у асноўны рэйтынг.
"Для БДМУ ўключэнне ў асноўны рэйтынг стала якасным прарывам", – падкрэслілі ва ўніверсітэце.
Другім беларускім універсітэтам, прадстаўленым у The World University Rankings 2027, стаў БДУ. Ён таксама апынуўся ў групе 2001+, тады як годам раней займаў пазіцыю 1501+.
Як універсітэты трапляюць у рэйтынг
Універсітэты ацэньваюцца па 18 паказчыках, аб'яднаных у пяць напрамкаў: выкладанне, даследчае асяроддзе, якасць даследаванняў, міжнародныя сувязі і ўзаемадзеянне з прамысловасцю.
Каб трапіць у асноўную табліцу ёсць абавязковыя ўмовы. Напрыклад, універсітэт павінен мець не менш за 1000 навуковых публікацый за пяць гадоў і не менш за 100 штогод.
Усяго ў The World University Rankings увайшлі 2297 універсітэтаў з 118 краін.
Якія ўніверсітэты сталі лепшымі
Першае месца ўжо 11-ы год запар утрымлівае Оксфардскі ўніверсітэт. Следам размясціўся Масачусецкі тэхналагічны інстытут. Трэцяе месца падзялілі Прынстанскі і Стэнфардскі ўніверсітэты.
Таксама ў першую дзясятку ўвайшлі Кембрыджскі і Гарвардскі ўніверсітэты, Каліфарнійскі тэхналагічны інстытут, Імперскі каледж Лондана, Каліфарнійскі ўніверсітэт у Берклі і Ельскі ўніверсітэт.
