Беларуска Анастасія Арол стала сярэбранай прызёркай чэмпіянату Еўропы па сучасным пяцібор'і.
Пра гэта паведамляе БЕЛТА.
У фінале за званне чэмпіёнкі кантынента змагаліся 18 спартсменак.
Пасля трох відаў праграмы – фехтаванне, паласа перашкод і плаванне – наша суайчынніца мела найлепшую суму балаў, на два ачкі апярэджваючы бліжэйшую пераследніцу Ільке Азюксель.
Аднак на заключным агнявым рубяжы лепш адпрацавала менавіта прадстаўніца Турцыі. Справіўшыся са стральбой хутчэй за суперніцу, Азюксель стварыла адрыў, які здолела ўтрымаць на апошнім крузе лазер-рана.
На фінішы Анастасія Арол саступіла турчанцы пяць секунд. Тройку прызёраў замкнула спартсменка з Венгрыі Бланка Гузі.
Усяго ўдзел у жаночым фінале прынялі тры прадстаўніцы Беларусі. Марыя Гнедчык паказала 9-ы вынік, а Віялета Гурэева стала 14-й.
Камандныя поспехі
На чэмпіянаце Еўропы, які праходзіць у Стамбуле, беларускія пяціборкі таксама сталі бронзавымі прызёркамі ў камандным першынстве.
У складзе нашай каманды на трэцюю ступень п'едэстала гонару падняліся Анастасія Арол, Марыя Гнедчык і Віялета Гурэева.
У камандны залік кожнай краіны ішлі вынікі ўдзельніц фіналу. У спартсменак, якія не трапілі ў топ-18 у асабістым першынстве, браліся ачкі за паўфінал або кваліфікацыю.
У выніку беларуская тройка набрала 4313 балаў і заняла трэцяе месца сярод 11 каманд. Золата заваявалі венгеркі (4360), срэбра ў зборнай Швейцарыі (4355).
Іншыя дасягненні
Увечары 8 жніўня адбыўся мужчынскі фінал, у якім выступіў беларус Уладзіслаў Мелказёраў.
На паласе перашкод беларус быў самым моцным: яго вынік у 372 ачкі стаў найлепшым у фінале. Другім з 370 ачкамі стаў італьянец Матэа Бавенцы, трэцім – украінец Юрый Кавальчук (366 ачкоў).
У плаванні Уладзіслаў паказаў 13-ы вынік (311 ачкоў) і захаваў высокія пазіцыі ў агульным заліку. Аднак у лазер-ране беларускага спартсмена падвяла стральба – 653 ачкі (16-ы вынік), што адкінула яго на 9-е месца з вынікам 1574 ачкі.
У камандным першынстве зборная Беларусі ў складзе Уладзіслава Мелказёрава, Уладзіслава Несцерава і Івана Хамцова набрала 4645 ачкоў і заняла 7-е месца.
Праграму чэмпіянату Еўропы па сучасным пяцібор'і ў Стамбуле ў нядзелю завершыць змяшаная эстафета.
Адзначым, што кантынентальны форум у Стамбуле з'яўляецца першым за пяць гадоў, на якім беларускія пяціборцы выступаюць з нацыянальным сцягам.
