Кляшчы атакуюць Мінскую вобласць – колькі чалавек пакусалі за ліпень

У ліпені ў арганізацыі аховы здароўя Мінскай вобласці з прычыны прысмоктвання кляшчоў звярнуліся 433 чалавекі, у тым ліку 142 дзіцяці.

Такія звесткі прывялі ў Мінскім абласным цэнтры гігіены, эпідэміялогіі і грамадскага здароўя, піша "Звязда".

З пачатку года кляшчы пакусалі 1536 чалавек, з іх 533 – дзеці. Часцей за ўсё кляшчы нападалі ў лясных масівах (47,5%), у сельскай мясцовасці і на дачных участках (32,3%), на тэрыторыях жылой забудовы (7,4%).

Такія выпадкі рэгістраваліся на ўсіх адміністрацыйных тэрыторыях Мінскай вобласці, за выключэннем Крупскага, Смалявіцкага і Старадарожскага раёнаў.

Клешчавыя інфекцыі

Спецыялісты адзначылі, што ўзбуджальнікі клешчавых інфекцый пранікаюць у арганізм чалавека пры прысмоктванні заражанага кляшча са сліной, праз мікратраўмы на скуры пры зняцці кляшча неабароненымі рукамі або выпадковым раздушванні, а таксама пры трапленні на кан'юнктыву вока.

"Вірус клешчавога энцэфаліту можа перадавацца пры ўжыванні ў ежу некіпячонага казінага (радзей – каровінага) малака з прыватнага падворка або прадуктаў яго перапрацоўкі. Кіпячэнне малака на працягу дзвюх хвілін цалкам забівае ўзбуджальніка клешчавога энцэфаліту", – сцвярджаюць у цэнтры.

Рэкамендацыі медыкаў

Кляшча, які прысмактаўся, нельга апрацоўваць алеістымі рэчывамі (алеем, крэмам і гэтак далей) і агрэсіўнымі вадкасцямі, такімі як бензін, каб пазбегнуць траплення змесціва кішэчніка кляшча ў рану, упэўніваюць спецыялісты.

Выдаляць кляшча лепш за ўсё ў медыцынскага работніка. Пасля гэтага варта абавязкова звярнуцца да ўрача-інфекцыяніста ці ўчастковага ўрача-тэрапеўта (педыятра) для прызначэння прафілактычнага лячэння – яно максімальна эфектыўнае ў першыя 72 гадзіны пасля ўкусу – і ўстанаўленні медыцынскага назірання.