Дваранская сядзіба Алешаў, якая знаходзіцца ў пасёлку Новаберажное Столінскага раёна, нарэшце займела гаспадара.
Стары маёнтак з уласнай башняй-абсерваторыяй прадалі на таргах пляцоўкі "БУТБ-Маёмасць". Гэтым разам за яго зноў горача змагаліся, піша партал Domovita.
Зараз цана аказалася прыкметна ніжэй за ранейшую. За маёнтак змагаліся 2 удзельнікі, якія за 2,5 гадзіны зрабілі 33 стаўкі. У выніку кошт вырас у 4,3 разу – з 12 892 да 54 792, ці прыкладна $18 100.
Новым уладальнікам асабняка стала прыватная будаўнічая арганізацыя з Пінска. Пакуль не паведамляецца, што менавіта будзе рабіць кампанія з сядзібай. Пры гэтым афіцыйнага статусу матэрыяльнай гісторыка-культурнай каштоўнасці ў будынка няма.
Разам з асноўнай пабудовай пакупнік набыў старую лядоўню, а таксама атрымаў права арэнды каля 37 сотак зямлі тэрмінам на 50 гадоў.
Што гэта за сядзіба
Маёнтак пабудавалі ў 1890 годзе для дваранскага роду Алешаў. Дарэчы, з гэтай сям'і паходзіў знакаміты савецкі пісьменнік Юрый Алеша.
Плошча асабняка – каля 426 м2, а яго сцены складзены з чырвонай цэглы. Прычым, калі верыць мясцовай легендзе, кожную цэглу прывозілі на будоўлю загорнутай у паперу.
Галоўная асаблівасць дома – гранёная двухпавярховая вежа. Апошні ўладальнік маёнтка Канстанцін Алеша цікавіўся астраноміяй і абсталяваў там сапраўдную дамашнюю абсерваторыю з тэлескопам, адкуль назіраў за зоркамі.
У савецкія гады жыццё сядзібы моцна змянілася. У былых дваранскіх залах падрыхтавалі кватэры для работнікаў мясцовага спіртзавода. З часам жыльцы раз'ехаліся, дом закансервавалі, і ён пачаў паступова разбурацца.
