На 60-гадовую пенсіянерку ў Горацкім раёне ўзбудзілі крымінальную справу за незаконнае хаванне боепрыпасаў, паведамляе прэс-служба Дзяржаўнага камітэта судовых экспертыз.
У хаце жанчыны праваахоўнікі знайшлі 36 патронаў і адправілі іх на экспертызу.
Cпецыялісты высветлілі, што 35 з іх зробленыя заводскім спосабам і пераважна прыдатныя для стральбы. Адзін патрон апынуўся самаробным і не баявым.
Пенсіянерка расказала следчым, што дом яна купіла больш за 20 гадоў таму. І баепрыпасы ёй дасталіся ад папярэдніх уладальнікаў.
Прычым даведалася яна пра гэта толькі некалькі гадоў таму. Унук, які гасціў у бабулі, выпадкова знайшоў сховішча патронаў у старым халадзільніку. Аднак жанчына паклала патроны назад і не надала гэтай знаходцы сур'ёзнага значэння.
А дарма. Арсенал у цэласці і захаванасці дачакаўся супрацоўнікаў міліцыі. На пенсіянерку ўзбудзілі крымінальную справу.
