Беларускія навукоўцы прааналізавалі, якія прафесіі, фармат і рэжым працы выклікаюць стрэс наймацней.
Даследчыкі выкарысталі адразу некалькі метадаў ацэнкі псіхаэмацыянальнага стану працуючых беларусаў. Вынікі паказалі, што людзі часцей за ўсё недаацэньваюць узровень уласнага стрэсу, піша партал Prodelo са спасылкай на "Беларускі эканамічны часопіс", дзе аўтары апублікавалі працу.
Суб'ектыўная ацэнка ўдзельнікаў аналізу нярэдка аказвалася ніжэйшай за аб'ектыўныя паказчыкі.
Сярод прафесійных груп найбольш работнікаў з выяўленым стрэсам зафіксавалі ў вытворчай сферы – 24%. Сярод менеджараў гэты паказчык склаў 20%, у офісных работнікаў – 11%, а ў сферы паслуг – 8%.
Пры гэтым самы высокі ўзровень стрэсу даследчыкі адзначылі ў прадпрымальнікаў і выкладчыкаў.
Як фармат працы ўплывае на напружанне
Сярод супрацоўнікаў, якія працуюць на тэрыторыі наймальніка – у офісе або на вытворчасці, 14,5% адчуваюць высокі ўзровень стрэсу.
Пры гібрыдным фармаце гэты паказчык склаў 6,75%. А вось у работнікаў, цалкам занятых аддаленай працай, выпадкаў высокага ўзроўню стрэсу наогул не было.
З рэжымаў працы самы стрэсавы для супрацоўнікаў – зменны графік. Сярод тых, хто працуе па начах, 30% адчуваюць высокі ўзровень напружання.
Пры дзённых зменах паказчык ніжэйшы, але не нашмат – 24%. Сярод супрацоўнікаў, якія працуюць па пяць дзён, моцны стрэс адчуваюць 10,1%.
Узрост мае значэнне
Таксама аналіз паказаў, што работнікі 41–50 гадоў найбольш схільныя да стрэсу (18,2%). У моладзі – 20–30 гадоў – паказчык склаў 16,2%.
Сярод людзей 31-40 гадоў высокі ўзровень стрэсу выявілі ў 6,2%, а сярод работнікаў маладзейшых за 20 гадоў – у 7,7%.
Але ў агульнай карціне даследчыкі падкрэсліваюць, што ўзровень стрэсу сярод працуючых беларусаў застаецца ўмераным.
Гэта прыводзіць да высновы, што большасць супрацоўнікаў знаходзіцца ў дастаткова стабільным псіхаэмацыянальным стане, і гэта дазваляе захоўваць высокую працаздольнасць.
