На захадзе Грузіі – у краі Гурыя – адбылося ДТЗ з мікрааўтобусам, у якім ехалі 19 грамадзян Беларусі, паведаміў МЗС БелТА.
Турыстаў везлі з курортнага пасёлка Гамісмта ў горад Азургеці.
"Па прадстаўленай МУС Грузіі інфармацыі, кіроўца мікрааўтобуса не забяспечыў бяспечнае кіраванне транспартным сродкам, у выніку чаго мікрааўтобус з'ехаў з дарогі і ўпаў у цясніну", – расказалі ў МЗС.
Чацвёра беларусаў загінулі, пятнаццаць чалавек, сярод якіх шэсць непаўналетніх, атрымалі траўмы рознай ступені цяжкасці.
Што з пацярпелымі
Чацвярых пацярпелых даставілі ў бальніцы гарадоў Азургеці і Чахатауры, адзінаццаць чалавек – у Рэспубліканскую бальніцу Батумі. Двое знаходзяцца ў рэанімацыі, але, паводле інфармацыі галоўнага ўрача, іх стану нічога не пагражае.
Пасольства Беларусі ў Грузіі аказвае ўсю неабходную консульскую дапамогу. Консул Беларусі ў Грузіі ўжо выехала на месца здарэння.
МУС Грузіі ўзбудзіла крымінальную справу па артыкуле аб парушэнні правіл бяспекі руху або эксплуатацыі транспарту, якое пацягнула смерць двух і больш чалавек, што караецца пазбаўленнем волі на тэрмін ад 6 да 10 гадоў, піша ТАСС.
Кіроўцу затрымалі, але на дадзеным этапе яго нельга перавесці ў ізалятар, паколькі ён праходзіць неабходныя медыцынскія працэдуры ў клініцы, паведамілі ў ведамстве.
